Curdems da gronda dimensiun

La vischnaunca organisescha duront igl onn 2019 la rimnada da rufid bloccont sco suonda:
venderdis, ils 26 d'avrel 2019
venderdis, ils 18 d'october 2019
Ei vegn rimnau il rufid per l'entira vischnaunca sin la plazza Igniu sper baghetg economic.

Ils curdems ein da deponer sulettamein els containers ni navettas tschentai sil plaz. Per tenercasa vegn priu encunter max. 2 m³ rumians. Quantitads pli grondas, per ex. ord rumidas da casas e clavaus ein da transportar directamein e sin cuost dil caschunader ella deponia regiunala a Rueun. Rumians jamnils, q.v.d. rumians ch'ins dismetta el sac verd e rufid bloccont pign (dimensiuns max. 100 cm liung / 60 cm lad / 60 cm ault / peisa max. 30 kg) vegnan buca pri encunter. Tals rumians ein da plazzar als plaz da rimnada usitai els vitgs e che vegnan rimnai entras la Regiun Surselva mintgamai la mesjamna.

Ei vegn acceptau

  • maschinas pintgas e mopeds mo cun tratg giu ieli e benzin,
  • ferramenta, ferradira da tuttas sorts (meisas da fier, uaffens da fier, velos, bogneras da fier, crutschs da neiv e.a.v.),
  • tut las maschinas electronicas (computers, frestgeras, maschinas da furar, pegnas d'electrisch cun e senza ieli e.a.v.),
  • mobiliar movibel (letg, scaffa, suppia, madrazza, teppi denton buca culau giu (e.a.v.),
  • requisits per il temps liber e sport (skis, indrez da trenament, velos e.a.v.) ch’ein pli gronds che 100 cm liung / 60 cm lad / 60 cm ault ni pli grevs che 30 kg,
  • per sac da pupi (sacs da futter) vegn incassau ina taxa da frs. 5.--,
  • per pneus senza gavegl vegn incassau ina taxa da frs. 5.--, cun gavegl frs. 10.--,
  • per pneus da maschinas agricolas pintgas vegn incassau ina taxa da frs. 20.-- e per pneus da tracturs frs. 50.--,
  • calzers da skis san vegnir dai giu en favur dalla ARGO Tavau per frs. 5.--.

Buca acceptau vegnan

  • tuttas maschinas agricolas,
  • lenna da brisch, lenna veglia, lenna da beghetg (tabliaus, plantschius, lattas, quaders, panos, e.a.v.)
  • sacs da pupi e da plastic,
  • materials da paghetar (palets, styropor, plastic e.a.v.),
  • requisits per il temps liber e sport ch’ein pli pigns che 100 cm liung / 60 cm lad / 60 cm ault e pli levs che 30 kg (bob, scarsola, calzers da rodas, aissa-rulletta e.a.v.),
  • blachas da ballas da silo (verdas ed alvas).
  • curdems da baghetg (linoleums, isolaziuns, plastics, folias da tetg e da preits, e.a.v.) e curdems da fatschentas,
  • curdem verd da curtin e caglias, tals curdems san vegnir deponi sil plaz da rimnada ad Igniu,
  • cartun e pupi duei vegnir surdau alla rimnada entras las scolas resp. las uniuns,

Ils suandonts rumians vegnan rimnai cun ils rumians jamnils e basegnan las marcas sco suonda:

  • sacs tochen 50 kg; 1 marca da frs. 2.50,
  • rumians pigns tochen 100 cm liung / 60 cm lad / 60 cm ault e pli levs che 12 kg; 2 marcas da frs. 2.50,
  • rumians pigns tochen 100 cm liung / 60 cm lad / 60 cm ault entochen ina peisa da 30 kg; 3 marcas da frs. 2.50.

Nus appelein alla responsabladad da vischinas e vischins e supplichein da setener vid quellas ordinaziuns en favur digl ambient. Medemamein fagein nus attents da buca deponer rumians sin deponias illegalas (selvadias). Talas deponias cunterfan alla legislaziun per la dismessa da rumians e vegnan annunziadas als organs responsabels.
Per ulteriuras damondas stat il gerau responsabel bugen a Vossa disposiziun.

7175 Sumvitg, avrel 2019, departament d'ambient