Publicaziuns

Curdems da gronda dimensiun

Muort il coronavirus vegn la rimnada da rufid bloccont dils 24-04-2020 spustada. Il niev datum dalla rimnada vegn communicaus a dretg temps.

Bien engraziament per Vossa capientscha.
Suprastonza communala

Sumvitg,

CORONAVIRUS - Annunzia possessurs habitaziuns secundaras

Tuttas persunas che habiteschan actualmein en habitaziuns secundaras ella vischnaunca da Sumvitg ein supplicai da s'annunziar immediatamein tier la vischnaunca.

Per garantir il provediment en quella situaziun extraordinaria basegna il stab directiv dil cantun Grischun in schazetg dallas persunas che sesanflan actualmein el cantun Grischun. Nus supplichein perquei ils possessurs da habitaziuns secundaras ella vischnaunca da Sumvitg da s'annunziar cun indicar il diember da persunas e la vegliadetgna dallas persunas (carschi ed affons) che habiteschan actualmein ellas habitaziuns secundaras. Las datas che la vischnaunca rimna cun quell'evaluaziun vegnan tractadas confidenzial e duvradas a moda anonima. Da grond interess ei oravontut il diember e la vegliadetgna dallas persunas. Bien engraziament per Vossas stentas.

Nus supplichein d'aschuntar il formular sut cun Vossas indicaziuns e da returnar quel all'administraziun communala per e-mail (info [at] sumvitg [dot] ch) ni per posta (administraziun communala, Via Quadras Su 10, 7175 Sumvitg). Las indicaziuns san era vegnir communicadas per telefon. Per damondas stat l'administraziun communala bugen a Vossa disposiziun (081 920 25 00).

Sumvitg, 31-03-2020

Stab da crisa

 

Sumvitg,

Cumpensaziun per la sperdita da gudogn muort mesiras dil CORONAVIRUS

Ils 20 da mars 2020 ha il Cussegl federal decidiu differentas mesiras per reducir las consequenzas economicas duront il temps da corona. Quellas mesiras ein retroactiv valeivlas naven dils 17 da mars 2020.

Igl uffeci federal per assicuranzas socialas e las cassas da cumpensanziun d’AVS ein vidlunder d’organisar la procedura d’annunzia, ils sclariments e la procedura da pagaments.

Tgi ha il dretg sin ina cumpensaziun?

  • Geniturs cun affons sut 12 onns che han stuiu calar da luvrar cunquei che la tgira d’affons ordeifer la famiglia era buca pli garantida.
  • Persunas che han stuiu calar da luvrar muort mesiras da quarantina.
  • Persunas che lavuran sursez e che han ina sperdita da gudogn cunquei ch’ellas astgan muort las mesiras dil Cussegl federal buca pli luvrar.
  • Artists independents ch’ein pertuccai d‘engaschis annulai entras il coronaviruas.

Per retrer la cumpensaziun ei in’annunzia tier la Cassa da cumpensaziun necessaria.

Ulteriuras informaziuns ein disponiblas sin las paginas:

www.bsv.admin.ch

www.sva.gr.ch

Nus supplichein per enconuschientscha e stein bugen per damondas a Vossa disposiziun.

Administraziun communala

Sumvitg,

Purschidas dil commerci e dalla gastronomia

Dapi gliendisdis, ils 16 da mars 2020, ei era en Surselva la veta da mintgadi stada eri. Quei ha imensas consequenzas per il commerci da detagl e la gastronomia. Duront che las grondas fatschentas untgeschan immediat sin lur canal online, han numerusas fatschentas en Surselva extendiu lur purschidas sin furniziuns a casa, retratgas ord scaffas da brevs ni creau in commerci online ed ina spediziun postala. Biars offerents miran da furnir il medem di e per ordinari gratuitamein. Nus appelein a tuts da semussar solidarics cun nies commerci e da profitar da nos partenaris locals cun lur purschidas innovativas en quella situaziun speciala. Cun Vies sustegn sa nies commerci surviver quella crisa. Ensemen vegnin nus a dar damogn a quella crisa.

Tuttas purschidas dil commerci e dalla gastronomia en Surselva en fuorma da carta anfleis Vus sut www.surselva.shop respectiv www.grhome.ch.

Administraziun communala

Sumvitg,

Scamond da far fiug

Egl entir cantun vala naven dils 25 da mars 2020 tochen revocaziun in general scamond da far fiug.
Buca pertuccada ei la zona da habitar, sche la distanza da 50 m tier igl uaul sa vegnir garantida.

Sin fundament dil virus da corona vegnan ils spitals sco era las organisaziuns da sustegn polizia, schurmetg civil, pumpiers ed il militar a contonscher sias capacitads pusseivlas. Ord quei motiv ha la regenza ralaschau in general scamond da far fiug. Cun quella mesira duei la resca d’in incendi digl uaul ed ina surcargada dallas organisaziuns da sustegn vegnir minimada.

Sumvitg,

VIRUS DA CORONA - Tgira d'urgenza

La canorta Lumpazi porscha tgira d’urgenza per tuts affons denter 3 meins e 12 onns che han negina autra pusseivladad da tgira.

Gliendisdis – Venderdis, las 6.30 – 18.00

Dapli informaziuns anfleis vus sin la pagina d’internet www.lumpazi-cadi.ch.

Annunzias dueien succeder sut 081 936 40 65 / 079 380 10 38 / info [at] lumpazi-cadi [dot] ch ()

Sumvitg, 17-03-2020

Sumvitg,

Radunonza da vischnaunca

Muort il virus da corona vegn la radunonza da vischnaunca da mardis, ils 31 da mars 2020 pustada. Il niev datum dalla radunonza vegn communicaus a dretg temps. Bien engraziament per Vossa capientscha.

Suprastonza commuanla, Sumvitg 16-03-2020

Sumvitg,

VIRUS DA CORONA

Virus da corona

La Regenza dil cantun Grischun ha decidiu sin fundament dalla situaziun dil virus da corona pliras mesiras.

Quellas mesiras han grondas consequenzas per la societad ed era per nossas uniuns.

Denter auter vala la suandonta mesira naven da sonda, ils 14 mars 2020 entochen ils 30 d’avrel 2020:

  • Tut las activitads dallas uniuns sco radunonzas, trenaments, exercezis ein scumandadas.

Administraziun communala

Muort la situazion dil virus da corona resta il spurtegl dall’administraziun communala pil mument serraus. Tuttas damondas all’administraziun ston succeder en emprema lingia per telefon ni e-mail. L’administraziun communala decida allura schebein ei drova in’audienza.

 

Agid per gruppas da resca

Per persunas dalla gruppa da resca sco senior/as (65 onns +) ni persunas cun malsognas che duessan buca bandunar la casa che basegnan agid (p. ex. far cumissiuns, pagaments da banca, posta, viadis tier miedis etc.) porscha la vischnaunca agid. Talas persunas ein supplicadas da s’annunziar tier l’administraziun communala (081 920 25 00). La vischnaunca vegn a sestentar per procurar per in agid corrispundent.

 

Duront las proximas jamnas ei il stab crisa contonschibels duront 24 uras sin la numera 081 920 25 00. Ulteriuras informaziuns ein disponiblas sin la pagina d’internet www.gr.ch.

 

Nus supplichein per enconuschientscha e supplichein da risguardar las mesiras. Mo communablamein savein nus impedir la derasaziun dil virus da corona.

 

Sumvitg, ils 16-03-2020

Stab da crisa

Sumvitg,