Publicaziuns

Protocolls dallas votaziuns ed elecziuns dils 15-05-2022

Lubientschas da carrar per vias d'uaul e d'alp

Per las vias d’uaul e d’alp dalla vischnaunca Sumvitg vala tenor lescha da traffic dalla vischnaunca Sumvitg in scamond da carrar per tut il traffic. Las excepziuns ein medemamein regladas ella lescha numnada. Denter auter vegn vendiu per differentas vias lubientschas da carrar dil di. Las lubientschas da carrar dil di san vegnir retratgas a moda digitala ni sin canzlia communala, ellas ustrias ed ellas stizuns.

Per las suandontas vias sa vegnir retratg lubientschas dil di:

  • 340 Russein (Punt Gronda - Barcuns - Alp Russein)
  • 341 Crap Ner (Clavadi - Murtés - Crap Ner - Ruosna Sogn Gion)
  • 342 Glivers (Siltginas - Alp Glivers)
  • 344 Puzzastg (Mir Alv - Hettas)
  • 345 Runca (Laus/Hettas - Runca)
  • 346 Bostg (Laus/Hettas - Bostg)
  • 347 Naustgel (Val Dadens - Alp Naustgel)
  • 348 Vallesa (Bogn Tenigia - Vallesa)
  • 349 Runé (Runcahez - Runé)
  • 350 Val Tenigia (Lag Runcahez - Run - Val Tenigia)

carta cun las vias 

Retratga digitala

La cumpra digitala ei pusseivla cun l’app EasyPark ni per SMS. Cun EasyPark sa la taxa per carrar vegnir pagada directamein sur il telefonin, u cun in SMS ni sur l’app EasyPark. Il survetsch da SMS funcziunescha mo tier abonnaments da telefons svizzers tier ils quals la funcziun "Premium SMS" ei tschentada en. Ils cuosts per registrar la numera dil vehichel cun in SMS vegnan engreviai sur Vies quen da telefon. En cass che Vus duvreis l’app EasyPark, saveis Vus tschentar el parameter dall’app differents mieds da pagament. Per omisduas metodas – SMS ed app – vegn sefundau sin la numera dil vehichel.

Detagls SMS

Per retrer ina lubientscha directamein cun SMS ston las suandontas indicaziuns vegnir tarmessas alla numera 4400: *Nr. da via.Nr. vehichel

Exempel per Val Tenigia e la nr. digl auto GR1234: 350.GR1234

*340 Russein, 341 Crap Ner, 342 Glivers344 Puzzastg, 345 Runca, 346 Bostg, 347 Naustgel, 348 Vallesa, 349 Runé, 350 Val Tenigia

Detagls APP

Igl app EasyPark sa vegnir retratgs digl Apple Store e da Google Play.

Tier la cumpra d’ina lubientscha dil di digitala dat ei negina carta da carrar che sto vegnir deponida veseivlamein davos la finiastra digl auto. La controlla succeda cun mieds digitals sin fundament dallas indicaziuns registradas sur l’app ni cun SMS.

EasyPark ei vegniu introduciu per la vendita da lubientschas da carrar igl onn 2021. Sco usitau tier l’introducziun d’in tal sistem san sbagls aunc vegnir avon. Per che nus sappien meglierar il sistem ed eliminar sbagls essan nus avisai sin Vies agid. Nus supplichein perquei d’annunziar sch’ei dat eventuals problems. Nus engraziein per Vossa collaboraziun e per Vossa capientscha. 

El muossavia anfleis Vus ulteriuras informaziuns pertuccont EasyPark. 

Cumpra classica

Sper la cumpra digitala san las lubientschas vegnir retratgas els suandonts loghens:

  • Administraziun communala, Sumvitg
  • Volg, Sumvitg
  • Ustria dalla Staziun, Sumvitg
  • Ustria Cruna, Sumvitg
  • Hotel Greina, Rabius
  • Miniconsum, Rabius
  • Ustria Placi Pign, Surrein
  • Volg, Surrein
  • Ustria Val, Surrein/Val
  • Ustria Miraval, Sogn Benedetg

La carta da legitimaziun ei da deponer veseivlamein davos la finiastra digl auto naven dil mument che vegn carrau sin ina via cun signalisaziun „scamond da carrar per tut traffic“. Igl ei scumandau da copiar las cartas da legitimaziun. Scadina lubientscha vala mintgamai mo per ina via.

Administraziun communala

Sumvitg,

Cartas dil di

La vischnaunca da Sumvitg porscha per mintga di calendaric duas cartas dil di dalla VFF 2. classa.
Reservaziuns san vegnir fatgas per telefon, al spurtegl ni online sin la pagina d’internet. Las cartas dil di san vegnir empustadas online maximal 3 meins avon il di da reservaziun. Las cartas san vegnir retratgas al spurtegl dalla vischnaunca Sumvitg. Encunter ina taxa da frs. 5.-- saveis Vus schar tarmetter la carta dil di cun posta.
La carta dil di cuosta frs. 45.--. Igl import ei da pagar tier la retratga dalla carta al spurtegl. Tier spediziun cun posta ei la summa da frs. 45.-- plus frs. 5.-- spesas e porto da pagar cun il cedel da pagament aschuntau.
Cartas dil di ch’ein aunc disponiblas san vegnir empustadas naven dalla 8:00 uras il di avon il datum valeivel da viagiar per il prezi reduciu da frs. 20.--. Croda il di da viagiar sin ina sonda, dumengia ni gliendisdis sa la carta vegnir empustada e retratga naven dil venderdis endamaun allas 8.00 uras. La carta cul prezi reduciu sa denton mo vegnir retratga e pagada directamein al spurtegl dalla canzlia communala.
Sclariment dat bugen l’administaziun communala Sumvitg, Via Quadras Su 10, 7175 Sumvitg, telefon 081 920 25 00 ni info [at] sumvitg [dot] ch.

Sumvitg,

Informaziuns diever d'aua

Retrer aua da hidrants

Cun ils 1 da schaner 2018 ha la vischnaunca surpriu ils provediments d’aua dallas corporaziuns d’aua da nossa vischnaunca. Cul medem datum ei la nova lescha pil provediment d’aua ida en vigur. Per saver ademplir ils multifars pensums ch’il provediment d’aua caschuna sco era per metter entuorn prescripziuns surordinadas ha la vischnaunca saviu engaschar Roland Bearth sco caufontauna il fenadur 2018. El decuors dils davos dus onns ein la suprastonza communala ed il caufontauna stai sefatschentai intensivamein cun l’elaboraziun da novas structuras e metter ella pratica la lescha per il provediment d’aua.

Tenor lescha pil provediment d’aua e regulativ da taxas tier la lescha davart il provediment d’aua astga mo vegnir fatg diever d’aua da hidrants sin damonda e cun indemnisaziun. Il caufontauna ha ensemen cun l’administraziun communala elaborau in formular cun il qual Vus saveis far la damonda da prender aua da hidrants. Il formular sto vegnir inoltraus sil pli tard 48 uras avon ch’igl ei previu da retrer aua al caufontauna (info [at] sumvitg [dot] ch / Administraziun communala, Via Quadras Su 10, 7175 Sumvitg). L’indemnisaziun dall’aua succeda sco suonda:

  • pil consum d’aua:                                     frs. 30.-- per di
  • montascha ventil da reflussiun:                frs. 20.-- per hidrant

 

Aua astga vegnir retratga da hidrants sulettamein cun in ventil ch’impedescha ina reflussiun. Quel vegn montaus dil caufontauna. Il formular ei disponibels sin la pagina d’internet www.sumvitg.ch ni sa vegnir retratgs tier l’administraziun communala. Constatescha la suprastonza communala en quei connex ch’ei vegn retratg aua senza annunziar ei ina procedura da multa resalvada.

Plinavon ei il caufontauna avisaus sin Vossa collaboraziun tier projects da baghegiar. Nus fagein perquei attents ch’il caufontauna sto vegnir clamaus avon che colligiaziuns d’aua vegnan cuvretgas aschia ch’el sa mesirar e notar las colligiaziuns.

 

Schuar cun aua dil provediment d'aua public

El decuors dils davos dus onns han la suprastonza communala ed il caufontauna constatau che plirs purs fan diever d’aua da begls e dalla stalla ch’ein colligiai cun il provediment d’aua public per schuar ils praus. Ils menaschis agricols pagan lur taxa da consum tenor art. 2.2 c) dil regulativ da taxas tier la lescha davart il provediment d’aua. Tenor quest artechel vegn il diever per envernonta quintaus cun 50 cubics aua per onn. En quels cubics ei l’aua da beiber per ils animals sco era tut il consum per il diever ordinari dil menaschi cumprius. Tier il schuar praus setracta ei d’in diever extraordinari ch’ei buca cumprius ella taxa ordinaria.

Il schuar praus ei perquei sulettamein cun ina lubientscha dalla vischnaunca e cun in’indemnisaziun corrispundenta lubius. Ord quei motiv supplichein nus ils purs da terminar il schuar ni da far ina damonda per ina lubientscha alla suprastonza communala. Ina concessiun d’ina lubientscha sa buca en tuts cass vegnir garantida cunquei ch’il quantum d’aua avon maun dils provediments d’aua ei fetg differents en nos vischinadis.

La suprastonza communala ha capientscha che la schetgadad fa fastedis all’agricultura. Tuttina ei la suprastonza communala obligada da praticar la lescha vertenta.

Nus supplichein per Vossa collaboraziun ed engraziein per Vossas breigias. Per damondas stat il caufontauna bugen a Vossa disposiziun.

departament provediment d'aua / caufontauna

 

Sumvitg,