|
La necessitad che biars giuvenils obtegnan buca adina la pusseivladad da luvrar duront las vacanzas da stad ed aschia rimnar experientschas manualas per pli tard ha schau nescher tier il cussegl da scola l’idea d’anflar ina persuna che surprendess il survetsch d’intermediaziun per ina occupaziun dils giuvenils duront il temps da stad.
Il commember dil cussegl da scola ed impressari Otto Deplazes, Surrein ha survegniu l’incumbensa d’encurir quella persuna ch’ei prompta da segidar a realisar quei project.
Cun Annamaria Columberg-Schnoz da Sumvitg ed Ida Bearth-Tschuor da Surrein ha el anflau duas persunas che organiseschan quel a basa voluntaria en favur dils giuvenils da nossa vischnaunca.
Ils giuvenils dueien retscheiver la pusseivladad da luvrar duront las vacanzas da stad tier fatschentas e patruns enteifer la vischnaunca da Sumvitg ed aschia rimnar experientschas, emprender da luvrar e surprender responsabladad.
Ils iniziants vulan cun quella purschida augmentar la schanza dils giuvenils cura ch’els han d’encurir e sannunziar per ina plazza d’emprendissadi.
Ils patruns che han occupau ils scolars duront il temps da stad surdattan alla fin digl engaschi in pign giudicament che duei dar ina cuorta survesta sur dallas habilitads e promtadad da lavur digl engaschau e sur da sia persuna en general.
Quei giudicament sa sut circumstanzas levgiar al patrun d’emprendissadi l’elecziun digl emprendist ed aschia animar el da prender ils giuvenils che han rimnau cun lur engaschi da stad experientschas manualas.
Sper il fufergnadi dat in engaschi da stad ina detagliada survesta sur dils differents mistregns e sa eventualmein era levgiar al giuvenil l’elecziun dil mistregn. La gliesta aschuntada dat investa tgei fatschentas e persunas ch’ein promptas d’occupar ils scolars duront il temps da stad.
Il project da pilot ch’entscheiva cun la stad 2007 ei vegnius baghegiaus si per ils giuvenils dallas scolas superiuras.
Il survetsch d’intermediaziun sa denton vegnir augmentaus egl avegnir per ils scolars dallas scolas primaras sch’igl interess dils scolars e gentiurs ein avon maun.
Il cussegl da scola e las intermediadras animeschan ils giuvenils ed ils geniturs da nezzegiar quella caschun e da far diever dalla purschida. |
