 |
|
15.11.2007 Project d’ Advent dallas scolas dil scalem superiur da Sumvitg
|
Project d’ Advent dallas scolas dil scalem superiur da Sumvitg, en collaboraziun cun la SIGA (Sustener Interess da Giventetgna Activa)
Punt da generaziuns
Sur igl onn da scola 07/08 ha la SIGA projectau in per occurenzas cun ils scolars dallas superiuras en la Cadi. Nies tema ei: Punt da generaziuns.
Breil porscha: In musical dils scolars la primavera
Mustér porscha: Sentupada da giugar ensemen cun glieud dad autras vegliadetgnas
Tujetsch: Concert primavaun (?)
Las scolas da Sumvitg han elegiu il temps d’ Advent per realisar quei project.
Nus selegrein da saver envidar vus tuts ad ina ni l’ autra da nossas occurrenzas. Lein tgirar il contact denter giuven e vegl, ni scolars e carschi! Per che nus sappien realisar quei contact duvrein nus la collaboraziun dils carschi cun nus scolars.
Nus duvrein: Glieud da nossa vischnaunca che havess bugen ina viseta ad jamna duront las 4 jamnas d’ Advent. Tuts scolars ein obligai da far quellas quater visetas da ca. 1 ura ad jamna duront il temps liber. Ei sa esser che vus haveis ina lavuretta da schar far els (p.ex. better o neiv, schar leger avon zatgei, far cumissiuns), ni che vus saveis guder la cumpignia e dar giugs, mirar fotis e seser ensemen. Tgei che vus giavischeis e cu la viseta duess vegnir fatga stuessas far giu cul scolarA che vegn tier vus. Per vus ei quella purschida cumbinada cun negins cuosts. Per saver parter en tgi che va tier tgi, stuess jeu haver vossas annunzias sin mesjamna ils 28 da nov. (Gabriela Cabalzar 081 943 23 57 )
• Nus duvrein carschi che san dar troccas e che mussassen bugen da dar troccas a nos
scolars e scolaras dalla secunda reala e secundara. (ca. 26 carschi) La sentupada da
troccas ei fixada sin sonda suentermiezdi, ils 15 da december allas 13.30 tochen allas
16.00 uras en halla da Sumvitg. Bugen astgeis vus s’ annunziar tochen ils 7-12-07 tier:
Sandra Giger tel.: 081 936 32 79 ni Adrian Pally tel.: 081 936 47 67
• Ils scolars collaboreschan duront la messa Rorate a Sumvitg, ils 14 da dec.
allas 7.00 uras.
• Viseta dils scolars ella casa s. Giusep a Cumpadials, ils 21 da dec.
• Viseta dallas finiastras d’ Advent a Sumvitg, dumengia ils 23 da dec. allas 17.00 uras.
Ils scolars contan e leger avon. (deplorablamein cruschescha quei datum cun la
presentaziun dil giug da Nadal a Rabius, igl ei denton buc stau pusseivel da midar
termin. Nus sperein ch’ ils intressai ad omisduas occurenzas, vegnien dad ir a teater
la sonda sera)
• Nies “highlight” ei la concurrenza da far caltschiel: Giuven encunter pli vegl. Nus fagein
duas schlingias. Ina per generaziun. Tgi ei il pli spert alla fin cun la schlingia?
Separticipar astgan tuts che san far caltschiel, mintgin naturalmein en sia categoria.
1. gruppa: scolars, scolaras e giuvenils tochen 28 onns. 2. gruppa: carschi da 29 onns
ensi. La finamira ei che la schlingia circuleschi tier biaras persunas, ord quei motiv astga
mintgin far maximal 5 cm.
Da nossas sentupadas”suentermiezdi da troccas” e “ viseta dallas finiastras d’ Advent” mirein nus mintgamai tgei generaziun ch’ ei ordavon. Las schlingias vegnan ingantadas il Di dalla SIGA la primavera proxima. Cun ils daners dalla vendita lessan nus sustener il project da sur Ozioma a Nigeria: Mbara Ozioma.
Nus sperein che nus hagien fatg gust e plascher a vus da separticipar ad ina ni l’ autra da nossas occurrenzas.
Sincer engraziament allas pleivs dalla vischnaunca da Sumvitg ed alla SIGA per il sustegn finanzial, aschia che nus savein porscher alla sentupada da troccas zatgei dabeiber e zatgei dultsch senza stuer incassar dils participonts.
Cordialmein salidan scolaras e scolars dil scalem superiur cun lur scolastas e scolasts.
|
| |
|
|
|
