La suprastonza communala ha incaricau la scola FHS (Hochschule für angewandte Wissenschaften) da Sogn Gagl cun l’elaboraziun d’in concept da svilup per nossa vischnaunca. Tschun students sut il tgamun da dunna Rosella Toscano-Ruffilli, lic. oec. HSG, ein occupai cun quei project e vegnan en quei connex a far ina retscherca tier scadina convischina e scadin convischin da nossa vischnaunca. Vus haveis cheu la pusseivladad d’ofniar Vies meini pertuccont il beinstar da vischnaunca, la situaziun concernent il plaz da noss'economia ed ils potenzials da svilup che Vus veseis per nossa vischnaunca. Quella retscherca duei gidar a concretisar in grond diember da pusseivels potenzials en nossa vischnaunca che duein la finala vegnir posiziunai meglier e tenor pusseivladad era commercialisai pli efficient. Finamira principala dil concept ei da rinforzar l’attractivitad e cheutras era la qualitad da viver en nossa vischnaunca per nus indigens sco era per nos hosps.

Nezegei quella caschun e fagei paleis Vies meini cun tschentar ora il questiunari entochen ils 24 d'avrel 2007. Vus saveis era rispunder il questiunari leu nua che quei fa basegns en lungatg romontsch! Il questiunari sa vegnir tarmess directamein a dunna Nadia Eigenmann ni che Vus saveis dar giu el sin canzlia.

Nus engraziein gia ordavon per Vossas breigias en favur da nossa vischnaunca. La presentaziun dalla lavur ha liug ils 13-07-2007.

Cordials salids

Suprastonza communala Sumvitg